Po, kapitenia ime,
Jam batalioni yt,
me këpucët e lotëve të lidhura
nyje në fyt!
Nisem për luftë,
shtrëngoj rripat e ofshamave
e s’ka plumb që m’ndal.
Asnjë statujë
s’ngrihet në shpirtin tim
më lart se qeshja jote.
Ngadhënjimi i saj
e hijeshon shpirtin e ushtarit,
të bindjes!
Po, kapitenia ime,
Stërvitjet i bëj si luftë,
që betejën ta fitosh ti.
Ty shkëlqimi t’ka hije
e hija ime zhduket prej diellit
Tënd!
Këto janë lotët e fundit,
që derdh për ty, kapitenia ime!
Batalioni yt elitë rri i gatshëm,
me këpucët e lotëve të lidhura, nyje në fyt.
Do fitosh ti!
Unë do stërvitem për të tjera fitore të tuat!
Amin!
Arbër Ahmetaj
Arbër Ahmetaj lindi në Tropojë në vitin 1965. Është diplomuar për farmaci në universitetin e Tiranës dhe atë të Gjenevës. Në vitin 1986 filloi bashkëpunimin me shtypin shqiptar të asaj kohe dhe më pas punoi si gazetar në departamentin e informacionit në TVSH. Në vitin 1993 iu bashkua Ministrisë së Punëve të Jashtme dhe u specializua për diplomaci në Oksford, Uashington, Gjenevë dhe Maltë. Pas detyrave të ndryshme në këtë ministri u emërua Sekretar i Parë në Ambasadën Shqiptare në Bukuresht. Nga shtatori i vitit 1997 jeton në Sion të Zvicrës, ku ushtron punën si farmacist. Disa nga veprat e tij në prozë janë "Fletëhyrje për në varr", "Varri i braktisur", "I huaji, ai kosovari", "Një natë te Luiza", "69 gra", "Procesi 3K", si dhe librat me poezi "Më mori malli e dashur" dhe "Poezi". Nga viti 2020 është Kryeredaktor i Revistës Letrare.
Be First to Comment