Një Tiranë që pikon nga shirat realë dhe imagjinarë. Një autor – personazh, që rrëfen në vetë të parë “duke pikuar”, bashkë me shiun, pjesëza të personalitetit që nuk do të dorëzohet në rrjetën e hollë të padinjitetit, që bën presion të përditshëm në jetën tonë njerëzore të dekadave të fundit. Histori personale të gërshetuara me histori brezash e me historinë e një metropoli në tranzicion e transformim jo vetëm të pamjes, por të të gjitha marrëdhënjeve; shtet – individ, burrë- grua, i dashur – e dashur, etër – bij.
Autori Kliton Nesturi tenton dhe ia del mirë të realizojë një skaner delikat të të gjitha këtyre marrëdhënieve komplekse të një shoqërie e breznie post ’90-s, që ëndërroi, tentoi ndryshimin a përshtatjen, ia doli a u dorëzua, e përsëri gjenden të vetëdijshëm në vorbullën e ndryshimeve e të përshtatjeve që nuk janë të lehta.
Ka rrëfime dashurie e divorci, rrëfime ëndrrathyerish e njerëzish ambiciozë, ka tundime sensuale, edhe nga ato për të shkuar pa zhurmë në botën tjetër, ka rrëfime miqësish rezistente ndaj kohës e nga ato që nuk i rezistojnë ditënetëve.
Kliton Nesturin shkrimtar e ndjen të afërt në rrëfimin e tij që dhëmb, që analizon e tenton persiatje psikologjike, që pikon trishtim e fatalitet vdekjeje shpeshherë, që rrezaton dinjitet e pamundësi për të mbetur i tillë në një kohë kur paraja, qoftë dhe e papastër, krijon e vendos standardet e dinjitetit. Me pikat dhe rrëketë e shiut që bie në Tiranë, hyjnë dhe dalin në memorien e lexuesit personazhet e brishtë a arrogantë, vetmitarë a fatpranues, dështakë a vdekjepritës, ëndrrimtarë të padorëzueshëm a dashnorë rezistentë.
Çdo sekuencë romani është e prekshme, e jetueshme, e afërt, mbështetëse e dilemave tona personale. Fati i individit në një shoqëri pa shumë moral e shëmbuj-idhuj për t’u ndjekur, është në fotografinë e kohës sonë, realizuar përmes romanit nga Kliton Nesturi.
Do të të thoja “faleminderit Kliton!”, nëse nuk do ta lija ty monopolin e përdorimit të kësaj fjale në roman.
Thjesht po të them: rrugëtim të mbarë librit “Në Tiranë bie shi”!
Meqenëse edhe sonte në Tiranë bie shi…
Be First to Comment