Press "Enter" to skip to content

Poezi

Sa herë hyn ajo në shtëpi

Po më duket se po e shoh
gruan e ëndrrave të mia
e po më dhimbsen
banorët e qytetit të vogël
sepse sa herë ajo hyn
brenda shtëpisë së saj
dhe e mbyll derën
jashtë bën ftohtë

Gruaja dhe zogjtë

Pi kafe në ballkon
e në të njëjtën lartësi
matanë rrugës
në një apartament që nuk i hapen dritaret
as dera
jeton një grua
Në të njëjtën kohë
kur shkoj në kuzhinë për kafenë e dytë
dhe kthehem
ia nis të vizatojë në xhamin e dritares
me gisht
zogj në fluturim
Nuk është se ka imagjinatë
por i sheh zogjtë në qiell
dhe i kopjon

Imagjinatë kanë zogjtë
që vijnë në dritaren e saj

 

Ëndrra e pemës

Jam si pema
që i hedh gjethet
se do ta shtrojë
rrugën me to
ta zbutë për këmbët e saj
duke shpresuar
se ajo do të vijë
e do ta zgjedhë
për t’i ndërtuar shkallët
që do ta çojnë në qiell