Press "Enter" to skip to content

Shaip BEQIRI: Poezi

Korniza e thyer

Ti kurrgjë nuk di
Për xhunglat pa fund
Të këtij pylli të zhveshur

Si u mbështoll rreth nesh
Ky gjarpër i zi asfalti

Ti s’di përse nuk rritet bari
Përse nuk zverdhen gjethet
Në kornizën e praruar në mur

Blerimin tënd të vdekur
As vjeshta s’e shkel kurrë

Sall një valë jelebardhë
Nëpër dritare don të dalë
Të bëhet hija jote e gjallë

Ti njëmend nuk dike
Përse fryn kaq thellë në mua

 

Rruzulli te vetulla

Frederik Rreshpjes

Ti bart trishtimin
Që perënditë lanë në tokë

Një dru në vendlindjen time
Në bregoren që bora kurrë s’e mbuloi
Plagën tënde ka brenda

Atje vjen përsëri ora
Me vdekur edhe një herë

Dallëndyshja jote e hutuar
Që bënte zogj të verbër
Çukit gëzhojën e dhembjeve të mia

E qerasa një yll të dehur
Që të rrinte rruzull te vetulla

Shi i përbaltur baladash
Ra shkretëtirave të këngës
Enisé enisé

Zyrih, 19 qershor 2005

 

Muri

Zemra po të mos më mbetej
Bushtër e zhdëpur ngashërimi
Brenda këtij muri pa fund e anë
Më kot s’do t’ua nxirrja sytë yjve
As gjuhën s’do t’ia këputja një bilbili

Erdhi çasti i bukur
Çasti i vetëm i shumëpritur
Me vdekur si kulpër e përdredhur
Nën brymë e pështymë

Me e nxënë përfundi hijen
Që verbërisht më ka ndjekur
Përtej portës hapakrah mbetur

Do të më shpurin tevona
Jashta murit kaherë të rrënuar

Por do të mbetet përgjithmonë
Të më regëtijë zemërshkreta
Në guaskën që bart krahaqafë
Duke ngrënë veten në pusi

Gjuha më bie pluhur përdhe
Sipër hijeve të mbërthyera
Ndanë lumit nëntokësor
Që ulërin si tigri kur lëpin qiellin
Ndër pasqyra të thërrmuara pezmi

Ndër shtjella pluhuri e hiri
Ngrin prushi i verbër i yjve

Bern, 17 mars 2010

Të tjera nga ky autor:

    Nuk ka botime të tjera nga ky autor.

error: Content is protected !!