Yannis TZANETAKIS: Cikël poetik ⋆ Revista letrare

470Shares

Le të jetë

Në mes të natës shtrëngohem
pas tij. Ti je baba them
nuk më gënjen dot
dhe le të jetë sosur shtati yt
në përmasat e birit tim.

Bindurazi

Merrini këto kafshë
ishin lodra dikur
këmbët e tyre shkelnin mbi qilim
hynte dielli vështronin gjithnjë
të heshtura e të bindura
merrini këto kafshë
kujtesa nuk mund t’i mbajë
të rendin me kockat mbi bar.

I mungoj

Pa e qortuar qan
I mungoj që tani, ndonëse s’e kupton.

Nga vëllimi poetik “Jetë e thellë”, Botimet Kedros (2004)

Mos

Mos m’u prish
nuk di
si ribëhesh
nuk kam lodër tjetër
mos

Unë dalëngadalë

Jo thashë
nuk e ka fajin perdja e syrit

që më sheh përherë
e më të mjegullt

jam unë që mjegullohem dalëngadalë

unë që qaj mbyturazi pas perdes
fëmijë që theu vazon

Të dua ende

Poshtë gurit
e dheut

ajo që ti ke mbetur
të dua ende

Do shkojmë përsëri

Një mëngjes do shkojmë përsëri
në këndin e lodrave

Tani do ma mbash
ti dorën

që të mos iki
-siç ikin të mëdhenjtë-

gjithçka e pandryshueshme
kolovajset, shilarëset
litarët

do e jetë e diel dhe do fryjë erë

Nga vëllimi poetik “Patinë e mjegullt”, Botimet Polis (2017)

Yannis Tzanetakis ka lindur në Kallamata të Greqisë, në vitin 1956. Që prej vitit 1975 jeton në Athinë. Mbaroi studimet për Shkenca Politike dhe Ekonomike dhe ka punuar për një kohë të gjatë si gazetar. Ka botuar 9 libra me poezi dhe në vitin 2017 është nderuar me çmimin “Anagnostis” për vëllimin poetik “Patinë e mjegullt”, (Botimet Polis).

Përktheu: Eleana Zhako

(Skica nga @Vladimir Radibratovic)

Të tjera nga ky autor: