fbpx Press "Enter" to skip to content

Jacques PREVERT: Rojtari i burgut

Ku po shkon o rojtar i bukur burgu
Me atë çelës të njollosur nga gjaku
Po shkoj të çliroj atë që dashuroj
Nëse ka ende kohë
Atje ku e kam burgosur
Gjithë ëmbëlsi e ashpërsi
Në skutën më të fshehtë të pasionit tim
Në thellësinë më të madhe të trazimit tim
Brenda rrenave të së ardhmes
Brenda marrëzisë së betimeve
Dua ta çliroj
Dua të jetë e lirë
Edhe nëse më harron
Edhe nëse ikën
Edhe nëse rikthehet
Edhe nëse më do ende
Edhe nëse do një tjetër
Nëse i pëlqen dikush tjetër
Edhe nëse mbetem vetëm
Dhe ajo të ketë ikur
Do ruaj përgjithnjë
Brenda duarve të zgavërta
Deri në fund të jetës
Ëmbëlsinë e gjinjve të saj që erosi i ngjizi

Shqipëroi Eleana Zhako